El chuflete (la flauta, el pito, el chiflo)

Salir quere mes de marso, entrar quere mes de april,

cuando el trigo está en grano y las flores por abrir.

Estonces el rey d'Allemaña a Francia se quijo yir.

Con sí trujo gente mucha caballeros más de mil.

Con sí trujo un chuflete delas ferias de Paris.

Lo dio el rey de boca en boca, ninguno lo supo sonorgir.

--¡Un mal ay a tal chuflete, los doblones que por él di!--

Lo tomó el rey en boca y lo supo sonorgir.

Todas las naves del mundo, a seco las hico venir.

La parida que está pariendo, sin dolores la hico parir.

La creatura que está llorando, sin teta la hico dormir.

La novia que a su novio ama, a su lado la hico venir.

--¡Un bien ay a tal chuflete, que tantos doblones di por él!

del Romancero sefaradí de Laura Papo

Crucero gallego en Madrid

del Romancero sefardí de Laura Papo

Arbolera, mi Arbolera, tan galana y tan gentil, la rayis tiene de oro y las ramas de marphyl y la más chica ramica es una dama zarif. Y peñando los sus trensados con su peñe cristallín. Por ahí pasó un caballero que asemejaba a Amadil. --Ansí bivas, caballero, ansí el Dio vos deje bivir, ¿si visteis al mi marido, al mi marido Amadil? --Bien lo vide, bien lo conosco, letra tengo para ti. ¿Cuánto dieras, la mi señora, porque vo lo trusera aquí? --Diera yo mis tres doblones que me quedaron de Amadil. --¿Cuánto dieras, la mi señora, porque vo lo trusera aquí? --Diera yo los mis trensados que me quedaron de Amadil. --¿Cuánto dieras, la mi señora, porque vo lo trusera aquí? --Diera yo mis tres molinos que me quedaron de Amadil. --¿Cuánto dieras, la mi señora, porque vo lo trusera aquí? El uno muele pimienta y el otro giungulí y el más chico de eos arina blanca para Amadil. --¿Cuánto dieras, la mi señora, porque vo lo trusera aquí? --Diera yo mis tres hijicas que me quedaron de Amadil. La una mete la mesa y la otra para servir y la más chiquita de ellas, para burlar y para reír. --¿Dieras vos mi medio cuerpo, para que lo trusera aquí? --Si yo do mi medio cuerpo, ¿lo que le queda para Amadil? --Non penséis nada, mi señora, so yo vuestro marido Amadil.